Die neue Aussenkletterwand des Kletterzentrums Aranea in Schaffhausen ist heute offiziell eröffnet worden. Mit einem Sternenregen, Ballons und Worten von Regierungsrat Christian Amsler und Stadtrat Peter Neukomm wurde die Aussenkletterwand eingeweiht. Daraufhin durften alle Besucher die Kletterwand gratis ausprobieren. Der Geschäftsführer vom Zentrum, Pascal Parodi, freute sich heute Nachmittag über den Besucheransturm. Ausserdem habe sich bei der Einweihung auch gezeigt, dass das Kletterzentrum Aranea den Rückhalt von Stadt und Kanton habe.

Samstag, 9. April 2011, 10:00 Uhr, ARANEA (Es gilt das gesprochene Wort) 

Auf den Gipfel zu kommen, ist nur die Hälfte eines Aufstiegs. Auch wieder herunterzukommen, ist alles: Die Ziellinie ist nicht der Gipfel, sondern das Tal  

Liebi ARANEA Chletterer, liebi Gäscht, vor allem aber gschätztst ARANEA Team rund um dä Pascal Parodi 

Da isch erfreulich und au iidrücklich: Dä neui Ussebereich hät ä Flächi vo 470 m2 und befindet sich do a de Südfassade direkt nebed em Hauptiigang. 

Viili gueti Geischter und u.a. au mir vom Kanton und dä Hauptschponsor Ersparniskasse Schaffhausen händ ä Usse-Chlätterwand mit iidrückliche Dimensione ermögliched:
- 300 m2 Chlätterflächi, 13 m Höhi, 50 neui Routene, bis 4 m überhängend und Toppas und Topstop Sicherigsgerät

Und dezu ä Bischtroterrasse vo 50 m2, mit 30 Sitzplätz und eme erhöhte Blick uf d'Kletterwand.

Es 270 m2 grossi Dach ii 13 m Höchi überdeckt dä gesamti Chletterbereich sowie d' Terrasse und büüted do demit Schutz vom mängmol halt au garschtige Wätter.

Mit grossem Interesse han ich mich au immer uf dä Website vo dä ARANEA über dä Baufortschritt informiert. Das händ ihr toll gmacht! E super Sach! 

So, jetzt aber goots drum, dass alli Chletterfäns die neu Wand entdecked und die verschiedene Schtiig und Routene erklimmed. Dä berüehmti Extremalpinischt Reinhold Messner hät mol gseit: 

"Wer aber die Berge an die Menschen anpassen will, der macht den Berg und das Bergsteigen banal." 

Also nehmed da ernscht! Das isch jetzt euren neue Trainingsberg, wo zwoor i dä Natur dusse Training zuelooht, aber es richtig Naturerlebnis und d'Herusforderig vom richtige Berg nid ersetze cha. Wer nid selber emol es Gipfelglück koschted hät, an dä cha me no so viil Wort verschwende, - er wird's nie ganz verschtooh! 

Und e bekannti Bergschtiigerweisheit seit au: 

"En Gipfel ghört dir erscht, wenn du wieder unne bisch – so lang ghörsch du ihm." 

Ich bring eu allne die herzlichschte Grüess und Gratulation vo dä Schaffhuuser Regierig zum hüütige Freudetag. Als Sportminister und mit mir dä ganz Regierigsroot anerkenned mir die grosse Leischtige vo dä ARANEA für dä Schaffhuuser Breitesport und für gsundi Bewegig im Kanton Schaffhuuse: 

E paar Argument gfällig?

• über 300 Schulklassen würd so die spannend und attraktiv Schportart Chlättere ermöglicht
• rund 60 Kinder bsuched wüüchentlich äs Klettertraining
• ich finds ä super Sache, dass es Klettere jedes Jahr im FerienSpass total uusgebuched isch.
• die jährlich 40'000 Besucher en klare Bewiis sind fürs Bedürfnis vo dä ARANEA
• ich als Sonderschulroot überzüügt bii we sinnvoll es Klettere grad au für d' Chind vo dä heilpädagogische Schul isch
• und do ganz generell wertvolli präventivi Arbeet im schportliche Bereich gleischted würt! 

Die neu Chlätterwand ARANEA isch ä ganz ä wichtigst wiiters Mosaikschteinli. - oder wenn ich sie so aaluege ehner en Mosaikschteii, en Mosaikschteii i üserem Chline Paradies Schaffhuuse. Genau so Mosaikschtei bruuched mir. Schaffhuuse chlättered i d Höchi…. 

Und da isch …guet so!