Grusswort Regierungsrat Christian Amsler zum Konzert der Schaffhauser Schulen am 19.12.2014, 19:30 Uhr im St. Johann Schaffhausen

Dusse lüchted es Liechtermeer vo dä wunderbare hängende Schaffhuuser Wiehnachtsbelüchtig. Tuusig Liechtli i dä dunkle Nacht! 

Und do inne träfed mir üs i dä warme Konzertchile St. Johann zum beliebte Wiehnachtskonzert vo dä Schaffhuuser Schule. 

Singe verbindet, führt üs Mensche und au Liedguet us dä ganze Wält zäme und berüehrt jetzt wänig Täg vor Wiehnachte üseri Herze und Seele. 

Dä gross und dunkelblaui Flyer, wo me so wunderbar  cha uufchlappe und inne en grosse Schtärn mit allne Mitwirkende rundume finded, kündet üs es tolli Programm vom Konzert aa! 

HERZLICH WILLKOMME!

Scho wieder ä Joohr ume, möged die eine dänke. Mir Mänsche erläbed Moment, wo Ziit rast we verruckt, aber au Ziit, wo d'Uhr überhaupt nid wott vorwärtsgooh. Und doch isch Ziit immer genau gliich. Sekunde und Minute und Schtunde laufed immer genau gliich rasch oder äbe gliich langsam duure. 

Viel Mänsche säged hüt rasch mol "Ich ha kei Ziit!"

Da isch ä Uusred, isch nid wohr und isch ä Lüüg vor sich sälber. Jede vo üs hät Ziit. Jedem isch Ziit gschänkt! Ziit mome sich näh, sie mo immer wieder neu iigfange wärde, damit dä Sekundemoment zum Schtuundemoment wärde cha. 

Hüt simmer alli zäme cho und nämmed üs Ziit für d'Musik und besinnlichi, fröhlichi, aber vielleicht au nochdänklichi Moment. 

D'Chinde singed  für üs. Schtill wärde und zuelose heisst aber au a anderi Mänsche tänke. Dänked mer i däre Wiehnachtsziit vor allem au a di viele Chinde uf däre Wält wos nid eso guet goot we üs do i dä Schwiiz. Ich dänke do debii a die zahlriiche Familie wo derziit rund um dä Erdball uf dä Flucht sind. 

Oder aber au a chranki Chind! D'Radio Munot Aktion lauf derziit und isch für Chinde mit Chrebs und ihri Familie beschtimmt. E ganz e gueti Sach isch die Schtiftig für Chinderchräbs vom Schaffhuuser Daniel Ciapponi, wo sin Sohn Emilio verloore hät und drum mit die Schtiftig is Läbe gruefe hät.. 

Ich wett herzlich danke! Em OK under dä Leitig vom Kantirektor Dr. Urs Saxer mit em Ueli Waldvogel Herzig und dä Beatrice Zeindler vo dä Kanti, dä Sonja Ehrenzeller und Anna Brügel (Chindergarte und Primarschuel vo minere Wohngmeind Schtette), em Christian Eckhardt (Oberstufe Randental Schleitheim), dä Carmen Oswald (Freiwillige Chor Sekundarschuel Buechthale) und em Vaclav Medlik (Trompetenensemble). 

En ganz en grosse Dank goht natürlich vor allem au a alli Mitwirkende, d'Chind und di Jugendliche vo dä verschiedene Chindergärte, Schuele und vo dä Kantonsschuel mit ihrne Leitige. 

Dänn aber au a d' Solischte und Begleiter Marc Wanner, Katerina Nett, Maya Lüscher Fabrizia Riederer und Noah Näf (am Klavier, a de Orgle oder am Schlagzüüg). 

Alli Mitwirkende chönd schtolz si uf es musikalisch Erschaffeni, wo mir alli törfed gnüsse hüt Obig. Allne Lehrerinne und Schülerinne, Lehrer und Schüeler gratuliered mir härzlich zu däre grosse Vorbereitigsleischtig.

Ohne grosszügigi Sponsore wär da musikalisch Fäscht vo dä Besinning nid möglich. Mir freued üs sehr über Ihres Engagement für ä unvergesslichi und wertvolli Sach. 

Chind, wo zäme musiziered zum Wiehnachtsfäscht, es Lüüchte i dä Auge und Ziit, wo sie üs allne schänked. Ziit zum Zuelose, Luege, Schtuune und Freud ha a de Leischtige vo däne Chind und Jugendliche, wo doch üseri Schaffhuuser Zuekunft sind!

 Unterstützt händ da: 

D' Schaffhuuser Kantonalbank, d' Cilag, di Städtische Werk SH/NH,
d' sasag Kabelkommunikation, Schtadt und Kanton Schaffhausen 
und d' Mediepartner Radio Munot, Schaffhuuser Fernsehe und d' Schaffhuuser Nachrichte.

Ich freu mich, dass ich hüt zäme mit Ihne allne debii si darf wenn fiirlichi und fröhlichi Musik die wunderbare Chile St. Johann erfüllt und mir die wunderbare Kläng törfed erläbe.

Jo, jetzt goots uf Wiehnachte und Silveschter zue. 

Es Joohresend isch kei End
Und de Joohresaafang isch kein Aafang.
Sondern ä Wiiterläbe mit dä Weisheit, wo üs d'Erfahrig glärnt hät. 

Ich wünsche vo Herze ä liechtvolli und schtimmigssvolli Wiehnachtsziit und en besinnliche Rutsch is neu Jahr 2015. Mög eu alli en hälle Schtärn im neue Joohr dä Wäg uuslüchte. 

Und mög gnueg d'Ziit fürenand do sii. Denn Ziit isch nid eifach selbschtverschtändlich, si isch zwor do und üs allne gschänkt. Aber, nomol, mir mönd si au griife und aahalte, äbe zum Ziit fürenand ha.

Und üs allne wünsch ich, dass es üs immer wieder glingt, z'begriffe, dass 

Vergangeheit, Gschicht isch,
dass Zuekunft ä Gheimniss isch und
Jede Augeblick ....isch ä Gschenk! 

Drum gnüss ich dä Augenblick mit Ihnen allne zäme ganz bewusst! 

Frohi Wiehnacht 2014 mitenand!