"Es BBZ hinder em Bahnhof" - Herzliche Gratulation zum 50. Geburtstag

Zuegäh, liebs BBZ Hauptgebäude. E bitzli niidig bini schon uf dich. Praktisch gliich alt simmer, sozäge Joohrgänger. 

Du Baubeginn 1960, und Schtart vom Unterricht November 1964 und Iiweihigsfiir am 12. März 1965. Ich bii im November 1963 gebore. 

Und bi mir hät viil meh dä Zaah vo dä Ziit gnagt. Du häsch diversi Faceliftings hinder diir und erschtrahlsch im Glanz, we äbe neu gebore. Hüllesanierige, neui Fänschter giits da Joohr, neui Schminki uf dä Fassade. Ich has Gfüehl, dass du eigentlich immer jünger würsch und mir älter. 

Wie nähmed d' Schaffhauserinnen und Schaffhauser üseri Berufsschule woohr?

"Es BBZ hinder em Bahnhof", - so kenned wohl die meischte Mensche i de Region Schaffhausen üseri Bruefsschuel. 

Mit däm schlichte und funktionale Bau an beschter Lag i de Kantonshauptschtadt verbinded ganz viel Bruefslüüt vo üsere Region eigeni Schueljoohr und Erläbnis. Es Gebäude hät sich entwickelt, und hät sich immer meh au dä Mänsche, wo do inne wirked, und ihrne Bedürnis aapasst. 

In der Schaffhauser Berufsfachschule wirked engagierti Mensche täglich zum Wohl vo de junge, angehende Bruefslüüt. Schuelleitig und Lehrerschaft fördered di Lernende und Schtudierende i ihrer Persönlichkeit, um ihne selbschtändigs und eigenverantwortlichs Lerne und Handle z'ermögliche. Sie sensibilisiered die Lernende und Schtudierende aber au zu verantwortigsvollem Handle gegenüber vo dä Mitmensche, dä Gsellschaft und dä Umwelt. Es Ziil isch e guet uusgebildeti Handligskompetenz, wo de aavertraute Uuszubildende e erfolgriichi Bruefsusüebig ermöglicht. 

Uus- und Wiiterbildig isch guet und wichtig. Es goht aber vor allem au um Lebenstauglichkeit. Da isch au die gross Schtärchi vom Duale Modell! Uusbildigsgäng sind interdisziplinär und praxisnooch aagläit. 

Längscht händ moderni Lernmethode und modulari Bildigsinhält schtuurs und wenig noochhaltigs Aahüüfe und Iitrichtere vo Fachwüsse abglöst. In jedem Fall lohnt sich en guet gfüllte Wüssensrucksack, vo dem me immer wieder zehre und ihn immer wieder au neu aafülle cha. 

Ich freue mich als Schaffhauser Erziehungsdirektor und au als Präsident vo dä Uufsichtskommission vo de Bruefsfachschule am Hintersteig über da hüütig Jubiläum. 

Grossi Herausforderige schtöhnd uf em Arbeitsmarkt aa. Di demografische Entwicklige schlöhnd voll duure. 

Luut enere umfassende Schtudie fähled üs bis iis Joohr 2030 rund 400'000 Arbeitnähmendi! Es fehled Arbeitschräft i diverse Wirtschaftszwiig und es Gschpengst Fachkräftemangel isch kei Fata Morgana. Mit ere bessere Vereinbarkeit vo Familie und Beruf (Stichwort Tagesstrukture) chönnt me zumindescht d' Hälfti, also rund 200'000 Arbeitplätz, abdecke. Alternativen sind (no) meh Arbeitnehmendi us em Ausland, es Ufesetze vom Pensionsalter, oder ä Abkehr vo de grassierende Tendenz zu immer meh Teilziitpense. 

Gegeschtüür cha au sehr unpopulär sii und schwierig... 

Gueti Ziite für jungi Schulabsolventinnen und -absolventen uf de Suechi noch enere   passende Lehrstell, wet me meine ! De Trend verstärkt sich, dass dütlich meh Lehrstellen zur Verfügung schtöhn, als potenzielli Lernendi us de Schuel chömmed.

D' Milchbüchlirächnig, dass es ufgrund vo däre Tatsach eigentlich kei Jugendlichi ohne Bruefiischtiigslösig gä törfti, wär aber gar au zu eifach. Bschtimmti Brüef, vor allem im handwerkliche Bereich, finded zum Teil nu schwer ihren Bruefsnochwuchs.  

E Paar Jugendliche glingt de Übergang vo de Schule i d' Bruefswelt nid uf Aahieb. Do griiffed die guet usgebaute Bruggeangebot vom Kanton Schaffhuuse wes Bruefsvorbereitungsjahr (BVJ), Hot BiZ, Ready for business oder es Case Management. Mir lueged däne Jugendliche, wenn au bschtimmti Kreise jetzt es Gegeteil behaupte wänd im Kontext vom Entlaschtigsprogramm 2014 und Unwoohrheite verbreitet.

Landuf und landab erschallt de Ruef, di naturwissenschaftliche und technische Brüef mit Noodruck z' fördere. D' MINT Initiative isch es Schtichwort dezue. Sie als Fachpublikum wüssed, MINT schtooht nid öppe für es Pfefferminzbonbon, sondern für Mathematik, Informatik, Naturwissenschaft und Technik. Gleichziitig sölled aber au no meh Fraue für die technischen Berufe begeischtered wärde. D'Initiative "go-tec" miteme Praxislabor für jungi Mänsche in Neuhuuse am Rhifall  isch e super Sach und ä tolli Verbundleischtig, aagrisse aber vor allem vo dä IVS mit ihrem aapackende Präsident Giorgio Behr.

Es giit z'wänig Ärztinnen, Informatiker, Lehrerinnen, Elektriker, Metzger, Pflegerinnen und Schreiner etc. Öppis fallt uf biim Duureblättere vo Ziitige und Ziitschrifte. D' Bruefsverbänd OdA (Organisationen der Arbeit) sind zwunge, zum aufwändigi und koschteintensivi Imagekampagne für ihri jewiilig Bruefsschparte z'schalte. De Kampf um de Nochwuuchs! Da isch früehner andersch gsii! 

Au mir vom Kanton schaffed täglich engagiert für dä Erfolg vo dä Bruefsbildig in Schaffhuuse. So wämmer d'Aazahl vo dä nid beschtandene Qualifikationsverfahren  uf gwohnt tüüfem Niveau halte, erhöhed d' Betriebsbsuech ii Zämmearbet mit de Berufsverbänd, fördered Bruefsabschlüss bi Erwachsene im Sinn vo dä Nochholbildig, mir wänd d'Bruefsbildig für leischtigsstarchi Lernendi fördere, aber au gnueg Aagebot für Leischtigsschwächeri sicherstelle usw. 

Es BBZ isch zäme mit üserem Gwerb und üsere Wirtschaft, aber au zäme mit dä Politik und Ihne allne ussegforderet, zum gmeinsam defür z'sorge, dass mir wiiterhin mit gnueg Fachchräft alimentiert sind und de Motor am Laufe ghalte werde chaa.  

Es giit viel z' tue, packed mers aa! 

D' Gemeinschaft vo dä Mensche macht schlussendlich es Herz und es wahri Läbe i dä Gebäudehülle us. Und da Herz pulsiert im BBZ mit sine viele guete Geischter, wos Bescht für die junge Bruefslüüt wänd. 

Es Geburtstagschind zeigt sich i erfreulicher Lebendigkeit und voller Dynamik. 

Dä Kanton isch domals en wegwiisende, muetige Schritt mit Vorbildcharakter gange und hät e grosszügigs Gebäude hinder em Bahnhof errichtet.

 50 Joohr - ä langi Ziit - ä halbs Joohrhundert. 

Damals im 1965 häts folgendi Grossereignis gäh: 

> De Bsuch vo dä britische Königin Elizabeth II. in Düütschland isch e riese Ereignis gsii und ä versöhnlichi Scheste vo britischer Siite. Zwischen däm und em letschte Besuch vonere britische Monarchin sind nämlich zwei Weltchrieg gläge! 

> Dä Winston Churchill und au dä Friedensnobelpreisträger, Philosoph, Urwalddokter in Lambaréné und Organist Albert Schweitzer sind 1965 gschtorbe. 

> Und erschtmolig hät mit em Papscht Paul de Sechst en Papscht vor de Generalversammlig vo dä UNO gschprooche. Die Rede isch en Friedensappell a d' Welt gsii und hät so viil Uufsehe erregd, dass sie als eini vo de bemerkenswertischte Rede vom 20. Jahrhundert i d' Gschicht iigange isch. 

Und es wichtigscht? Äbe: Schaffhuuse fiiret im März d'Iiweihigsfiir vom neue BBZ 

Es Gebäude BBZ schtooht für 50 Joohr erfolgriich betriebeni Duali Bruefslehr, wo me schtolz druf darf sii. Oft fählts dä Bruefbiildigsszene bitzeli amene gsunde Selbstvertraue. D' Medie brichtet jo gärn vo Schpitzeforschig, vo Erasmus, vo Bologna und Nobelpriis.

Dä fehlendi Schtolz isch aber überhaupt nid aazeigt. D'Schwiizer Bruefsbildig cha sich mit Fug und Rächt zeige i dä ganze Wält und da nid nu a de World Skills.

Grad fählts i vielne Länder mit gravierende wirtschaftliche Problem a guete Elektriker, Mechatroniker, Muurer oder Gebäudeautomatiker. Defür häts viili underbeschäftigti und arbeitslosi Universitätsabgänger. De gueti Mix machts äbe uus. 

Zum Wohl! Gmeinsam schtossed mir aa uf üseri wichtig Bildungsinstitution für d' Schaffhuuser Jugend. Mir fiiered hüt Obig mit em Feschtakt, morn mit em Bruefskongress und am Friitigobig mit em BBZ Fäscht dä 50. Geburtstag vo üserem "BBZ hinder em Bahnhof".  

"Lasst die Feste feiern, wie sie fallen." 

Dir, liebe Rektor Ernscht, und dinere ganze BBZ Frau- und Mannschaft wünsched mir herzlich ä positivs Wiitergedeihe vo däre wichtige Schuel. 

Herzlichi Gratulation im Name vo üs allne, vom Schaffhuuser Regierungsrates und de ganze Schaffhuuser Bevölkerig zum runde Geburtstag!