Messegelände auf der Breite, Mittwoch, 26. Oktober 2011, 19:00 Uhr

Liebi Gäscht und Messorganisatore
Liebi Messebsucherinne und Messebsuecher 

Es giit en schöne Läbesleitsatz, a dä ich mich auh immer z'halte versueche: 

„Wenn du öppis so machsch, wie du's siit 10 Jooh gmacht häsch, dänn sind d'Chance gross, dass du's falsch machsch." 

Da isch do obe uf dä Breiti i dä Herbschtmässehalle nid so! D'Organisatoren vo dä Schaffhuuser Herbschtmäss sind beschrebt, immer wieder neui innovativi Aenderige zschaffe, ohni es Bewährti über Bord z'wärfe. Da schätz ich ganz persönlich als langjöhrige Messebsuecher sehr.

Innovation, Wille zum Optimiere und au mol ganz Überraschends! 

Als Erziehigsdirektor bin ich jo nid nu für d'Bildig zueständig, sondern au no für Sport und Kultur. Und die Mess uf dä Breiti zeigt nid nu wirtschaftlichs Schaffe, sondern au Kultur! Me cha sogar es -ur hinne bi KULT-UR striiche und säge, sie isch KULT! Eifach nid wägzdänke vom gesellschaftliche Läbe in Schaffhuuse und en sichere, wichtige Wärt im Schaffhuuser Joohreskalender.

Schaffhause isch ä Kult- und Kulturregion erschter Güti! D' Halle für neui Kunscht sind weltwiit bekannt für ruumgriffendi Werk vo dä Gegewartskunscht, vom Joseph Beuys über dä Robert Mangold bis zum Bruce Nauman.  Die „Internationale Bachfäscht“ bringed Künschtlerinnen und Künschtler vo Wältformat noch Schaffhuusen und im Kulturzentrum Kammgarn trifft sich bim vo Radio DRS überträgene Schaffhuuser Jazz-Festival d' Avantgard vom Schwiizer Jazz. Im August schliesslich gänd sich am "das Festival" mitte im Herz vo dä Schaffhuuser Altschtadt uf em Härreacker Weltstars wie Simple Minds, Milow, Stephan Eicher oder Bryan Ferry d' Klinke in d' Hand. Und au im Rahmeprogramm vo dä Schaffhuuser Herbschmäss finded sich tolli Acts we Oropax, Boogie Woogie mit Chris & Mike, Route 66 usw. Und uf em Rote Sofa im Mediepavillion nähmed schpannendi Lüüt Platz, wo gwundrig mached.

Schaffhuuse büüted öppis, die mached öppis!
Sie g'sehnd - würklich ä chliis Paradies, uf da ich schtolz bi und drum sehr gern, -  we Sie alli au - mit minere Familie do läbe. Morn törf ich übrigens als Gaschgäber in Stei am Rhii alli 26 Erziehigsdirektorinnen und -direktore zur Jahreskonferenz vo dä Schwiizerische Erziehigsdirektorekonferenz EDK begrüesse. Morn chunnt au no dä Bundesroot Johann Schneider Ammann und am Friitig dä Armeechef KKdt André Blattmann uf Bsuech. Ich wärde Schaffhuuse im beschte Liecht verchaufe und sicher au vo dä aktuell laufende Schaffhuuser Herbschmäss verzelle!

En bsundere Gruess got a d'Gaschtregion Val Müstair. Gmeinsam mit em Schwiizerische Nationalpark bildet d' Biosfera Val Müstair es erschti hochalpini UNESCO Biosphärenreservat vo dä Schwiiz, sowie en regionale Naturpark vo nationaler Bedüütig. Für üs in Schaffhuuse hochinteressant, wo mir doch au uf em Wäg zumene mögliche Naturpark Rande-Chläggi-Südrande-Jestette sind. AREVAIR VAL MÜSTAIR!

Wa zeichned d'Schaffhuuser Härbschtmäss au no us? Ä iidrücklichs Abbild vom breite Wirke vo dä Schaffhuuser Undernähmige, dä KMU und vom Gwärb. Sehen und Gesehen werden. Wenn me di alphabetisch Uusschtellerlischte duurelueged isch me tüüf beiidruckt über die enorm Vielfalt vo dä Angebot.

Me kennt sich. A jedem Eggli en churze Schwätz, dänn wiiter zum nöchschte Schtand, da schafft Heimat und Identitätsgfüehl!

Und jetzt no ä chliis persönlichs Gheimniss: Vor viele, viele Joohr han ich do obe en orange Hobel für d'Chuchi mit ganz viil Zuesatztools bi däm faszinierende Überzüügistäter kauft, wo so wunderbari Schnitzli und Rüeblischtäbli anezaubered und dezue härrlichi Gschichtli us em Läbe verzellt. Ich bruuche dä Hobel immer no, aber er isch mittlerwille chlii schtumpf worde. Ich glaube fascht, ich mue da Joohr mol en neue poschte! Villicht chömmer da nochhär grad mache! Sie chaufed alli au eine und dänn chömmer zäme no näbed em Mässerabatt villicht no en Mängerabatt usseschinde!!!

Dä Schaffhuuser Regierigsroot freut sich sehr, dass für d'Schaffhuuserinne und Schaffhuuser und alli Gäscht i däne chalte Härbscht- und Näbeltääg wieder di beliebt Schaffhuuser Härbschmess als Träffpunkt für d'Mänsche und als Leischtigsschau vom regionale Gwärb ihri Tor cha öffne. Und do dezu wünsch ich dä Organisatore, aber vor allem au allne Uusschtellerinnen und Uuschteller ganz vili tolli Gschpröch mit dä Bsuecher. Mached Sie en Schritt uf d'Lüüt zue, zeiged Sie, wa Sie uf dä Platte und under em Hobel händ. Sie mönd sich wahrlich nid verstecke!

Willkomme zur Härbschtmäss 2011!