Liebi Turnerfamili, Turnerinne und Turner

Gschätzti Gäscht us Noh und Fern

Ganz herzlich willkomme do in Dörflinge im Schaffhuuserland

Mir händ ä iidrückliche Feschakt uf em Dörflinger Buck hinder üs mit eme fantastische Blick is Feschtgländ ie!

Es isch mir Freud und Ehr als Schaffhuuser Sportminischter eu di beschte Grüess vo dä Schaffhuuser Regierig z'überbringe do i dä Turnerarena vor dä Gymnaestrada Premiere, wo mir alli ganz gschpanne druf sind!

Mir sind grad z'Vierte choo, dä Regierigspräsident Ernscht Landolt, wo uf em Buck am offizielle Feschtakt es Wort ergriffe hät, und üseri Gattinne Christine und Liliane.

Dörflinge – herrlich gläge mit Rhiiaaschtoss und em Blick vom Buck uf di ganz Alpechette. Es Feschtgländ mit Uussichtsturm vor iidrücklicher Dorfkulisse – bii üs momme äbe sowieso nie Kulisse uufschtelle – prächtigi Natur, kei Papiermaché, alles echt und unverfälscht!

Kantonalturnfescht – da heisst sportliche, ambitionierte Wettkampf mit em nötige Training vorher, da heisst aber au Teamgeischt, Fairness und aber au Gselligkeit, Fröhlichkeit und Zämmeghörigkeitsgfüehl.

Hü tisch es völlig selbsverständlich, dass sich Turnerinne und Turner gmeinsam zum grosse Fäscht träffed. Gmischti TV und Manne- und Dameriege zäme. Da isch nid immer eso gsii.

So hät vor 150 Jooh amene Kantonalturnfest de damalig Präsident vom Turnverband de Bsuecherinne unde Bsuecher zuegruefe:

"Schickt eure Söhne auf den Turnplatz, denn Männer sollen sie werden an Leib und Seele!"

D' Töchtere hingege sind nid ermuntered worde, zum sich turnerisch z' betätige. Vielmehr hät dä Redner vo ihne verlangt:

"Und ihr, Jungfrauen, habt den nicht lieb, der nicht den Körper übt!"

Zum Glück, Tempi passati! Do cha me hüt nu lache drüber!

De Turnergeischt isch do am Fäscht sichtbar, hörbar und greifbar.

Wa es OK gleischtet hät, cha nid hoch gnueg iigschätzt wärde. Für dä grandios Iisatz, wo d'Grenze vo dä Freiwilligearbeit überschriited, wänd mir eu allne ganz herzlich Danke säge!

Die Solidarität, die Bereitschaft zumene freiwillige Iisatz für d'Gmeinschaft, das zeichned üsern Kanton und ganz bsunders au Dörflinge uus. Jedi und Jede bringt meh als 100% Iisatz mit em Resultat, dass d'Sach rund lauft und für alli Beteiligte und bsunders für üseri Gäscht zunere gfreute Sach wird.

Do druf bin ich stolz und dankbar. Au froh drüber, dass da so iidrücklich no möglich isch inere Ziit vo zuenähmender Individualisierig und Egoismus.

Alli, wo mitgholfe händ, händ do debii aber au e grosses Stück Gmeinschaftgeischt erläbt und sind sälber, - trotz em Schweiss uf dä Stirn, beriicheret worde.

Es isch em Ernscht Landolt und mir e bsunderi Freud mit eu zäme do am Schaffhuuser Kantonalturnfescht 2015 zsii – in Dörflinge – wo ich nu paar wenigi Meter do obe uufgwachse bii und d'Juegedriege vom TV Dörflinge bsuecht ha.

Jetzt wünsch ich aber üs allne mit de Schlussvorführig en krönende Abschluss und ganz viel positivi Iidrück, won ihr i dä Härze mit heim träge sölled.

Willkomme in Schaffhuuse – Willkomme in Dörflinge – em hüütige Hauptort vom Kanton Schaffhuuse!